|
Título
|
Convocatória do MDL para o 15-Dez-2001 |
|
Comentário
|
Convocatória do MDL para o encontro de 15 de Dezembro 2001, do que saiu o Manifesto 15D
|
|
Data
|
01-12-2001 |
|
Texto
|
AGORA MAIS QUE NUNCA, SOMOS REINTEGRACIONISTAS
Tod@s sabemos que a situaçom que estamos a atravessar, em que se fala da reforma da normativa, é novidosa no contexto destes últimos 20 anos de silenciamento e imobilismo institucional. O que dantes era um tabu, agora é tema de conversa quotidiano. Esse é o ponto que, entendemos no MDL, deve ser aproveitado para reclamar a legitimidade de intervirmos num debate de que o reintegracionismo tem sido sistematicamente banido. Participar no debate e nas decisons que atingem o modelo de língua é o nosso direito, como galeg@s e como colectivos e indivíduos destacados polo nosso esforço teórico mas também polo nosso compromisso radical com a normalizaçom lingüística na Galiza. É por isso que o MDL se sente no direito, mas também na obriga, de convocar todas aquelas pessoas e colectivos que desde o reintegracionismo queiram contribuir para a consecuçom da velha reivindicaçom de legitimidade para os nossos requerimentos.
Mas, para podermos reclamar essa legitimidade que nos tem sido negada ao longo destes vinte anos, é preciso fazermos um esforço de unidade. A voz do reintegracionismo deve ser ouvida, e deve ser ouvida agora que ainda estamos a tempo de decidir. Nom podemos, por motivos de ordem ética, ficar à espera, nem podemos contentar-nos com sorrir esperançados perante um processo que desde o início se tem caracterizado pola hipocrisia, a parcialidade e mesmo o silenciamento das dissidências.
O reintegracionismo tem de recuperar, no plano simbólico, o que de facto o tem caracterizado e lhe pertence no plano da acçom: a presença. E, neste processo, temos permanecido ausentes, talvez devido a umha excessiva atomizaçom do nosso trabalho.
Por esse motivo, queremos fazer um chamado a todas as pessoas e colectivos comprometidos com o reintegracionismo. Neste processo de debate queremos reclamar a presença de grupos lingüísticos, mas também a de aqueles que se destacam polo uso da língua como simples instrumento para outras actividades, porque som eles que enfrentam e vencem os maiores impedimentos e obstáculos, porque som eles que contribuem enormemente para a extensom dos usos reintegracionistas dando-lhe à língua justamente aquilo que procuramos: a normalidade, o facto ser um simples instrumento para desenvolver qualquer tipo de actividade: desportiva, musical, cultural, antipatriarcal, política, sindical... o que for . Assim, convidamos-vos a participar numha assembleia com o único objectivo de atingir, no possível, umha posiçom pública comum para todo o reintegracionismo no que diz respeito à reforma da normativa ILG-RAG. Dita assembleia terá lugar o próximo dia 15 de Dezembro, às 16h., numha sala da Residência Universitária "Monte da Condesa", no campus norte , em Santiago de Compostela. Esperamos a vossa presença, os vossos contributos, a vossa vontade para agirmos conjuntamente neste momento tam decisivo.
Cumprimentos cordiais,
Sílvia Capom Sánchez,
Porta-Voz Nacional do MDL.
P.S: Animamos a que venha o maior número de pessoas possível. No entanto, cada colectivo nomeará um Porta-Voz que participará numha mesa de trabalho em representaçom do colectivo. Isto nom impedirá que qualquer pessoa poida intervir desde o público quando chegar o momento. Tudo ao contrário, é o nosso desejo que intervenha o maior número de pessoas possível. A presença e o número de assistentes por grupo deverá ser confirmada no correio-e silviacapon@terra.es ou no telefone --- ------. |
[  Voltar para cima ] |
|
Recentes
]
Para Imprimir
Estatísticas