Umha iniciativa de livros viageiros soma-se às habituais actuações musicais e escénicas da Praça da Lenha

A tradicional Festa da Língua que se celebra na Praça da Lenha desde há já mais de dez anos volta este dezassete de Maio à cidade. O evento, organizado pola Assembleia Reintegracionista Ene Agá, o Movimento Defesa da Língua e a Associaçom Cultural Reviravolta com a colaboraçom do Concelho de Ponte Vedra, achegará à cidade música, espectáculos cénicos e actividades literárias para celebrar o nosso idioma internacional cum programa mais amplo do que nunca e que compreende umha actividade pioneira no nosso país como é a libertaçom de mais de cem livros nas ruas e praças da cidade.

Um concerto do grupo folque Pai da Cana às dez da noite do dia dezasseis dará começo, no local social A Reviravolta (Rúa Arcebispo Malvar, 33), aos actos da Festa da Língua 2004. O prato forte virá como já é tradicional na manhá do dia dezassete. A partir das once da manhá o grupo de percussom Trópico de Grelos encherá as ruas do casco histórico de ritmos afrobrasileiros num passa-ruas muito animado.

Perto das once e meia, coincidinco com a chegada deste rítmico desfile à Praça da Lenha, começarám as actuações, conduzidas polo humorista e debuxante Suso Sanmartim.

Os primeiros em actuar serám o grupo Lemorai, umha formaçom que mestura ritmos e de nacionalidades e que interpretará temas de todas as latitudes da lusofonia e nom só. Depois deles, de novo os tambores de Trópico de Grelos levarám-nos até a Praça da Verdura, onde aguarda o grupo de teatro de rua Os quinquilláns, que apresentam em estreia mundial a sua obra Moby Dick, umha nova versom da clássica história na que se mestura o trabalho de actores com bonecos. De volta à Praça da Lenha, Códia e Miolo amosarám-nos o seu bom fazer contando histórias, para continuar, contaremos com a presença internacional da Orquestra Gente que Encanta, um grupo vindo desde o Brasil e que interpreta, cumha instrumentaçom clássica, temas populares deste país.

Já às sete da tarde, os eventos levam-nos de volta ao local social A reviravolta, onde se fará entrega dos prémios do I Certame de Criaçom Em movimento, criado polo Movimento Defesa da Língua. No acto ademais, inagurará-se umha mostra com os trabalhos apresentados e haverá um número musical surpresa.

Durante todo o dia, a cidade acolherá a iniciativa, pioneira na Galiza, Livros livres.

Esta actividade consiste na libertaçom de cento quarenta volumes de literatura galega, portuguesa e internacional nas ruas da cidade seguindo o sistema do bookcrossing ou livros viageiros, que anima a gente a recolher e deixar de novo obras literárias nas ruas para que outros interessados as atopem e as libertem à sua vez, podendo seguir o itinerário do livro através da rede.