Após umha série de reunions nacionais dos diferentes grupos que venhem trabalhando na Galiza a nível local pola normalizaçom linguística de umha perspectiva reintegracionista, foi definitivamente criado neste mês de Fevereiro o Movimento Defesa da Língua, com o objectivo de unificar os grupos normalizadores de base e dar umha dimensom nacional ao seu labor de umha forma coordenada.

Fam parte do M.D.L. grupos como a Assembleia Reintegracionista Bonaval de Compostela, a Associaçom da Língua Artábria de Ferrol e Narom, o Grupo Meendinho de Ourense, Aquém-Douro de Tui e Renovaçao de Madrid, além de outros cujo trabalho, sem ser especificamente linguístico, sim procura a introduçom do Galego em diversos ámbitos, como é o caso de A Gente da Barreira de Ourense.
Trata-se de um projecto aberto ao que esperamos que continuem aderindo novos colectivos e pessoas no que de momento é o seu processo constituinte.

Os princípios que guiarám o caminho normalizador do M.D.L. serám dous fundamentais:

· Reintegracionismo Linguístico - Ligando com as ideias do nacionalismo histórico no referente à necessidade de recuperar a autenticidade do nosso idioma no ámbito por ele criado e ao que ainda pertence: o Galego - Luso - Brasileiro. Com efeito, o M.D.L. continuará servindo de agente socializador do trabalho teórico desenvolvido neste campo por entidades científicas como a A.Ga.L. ou personalidades como Carvalho Calero.

· Monolinguismo Social - Frente ao mito do "bilingüismo equilibrado" promovido polo poder autonómico, plasmado na imposiçom crua e nua do Espanhol e a progressiva marginalizaçom do Galego, seriamente ameaçado na sua condiçom de Língua Nacional da Galiza, o M.D.L. defenderá a necessidade de dar ao Galego o lugar que merece como ÚNICA LÍNGUA PRÓPRIA DA GALIZA.

Entre os projectos imediatos a desenvolver, está o de completar nos próximos meses o processo constituinte, dar a conhecer a nova organizaçom e iniciar a publicaçom de um boletim periódico de formaçom e informaçom linguística e cultural, de reparto gratuíto.

Animamos a quantos coincidirem na necessidade de existência do projecto agora fundado a pedir informaçom e somar-se à iniciativa, para o qual podem dirigir-se ao Movimento Defesa da Língua, escrevendo para qualquer dos seguintes apartados:

Apdo. 570 - Ferrol. Apdo. 850 - Compostela. Apdo. 550 - Ourense.
Em Fevereiro de 1996, assdo: Maurício Castro do M.D.L