Movimento Defesa da Língua

Novas da Galiza entrevistou o secretário geral da CIG-Ensino, sindicato maioritário no Enino.

Reproduzimos a seguir o texto da entrevista tal e como saiu publicada a semana passada no Portal Galego da Língua

O fortalecimento das relaçons transfronteiriças e o fomento de mais saídas laborais para o alunado galego som duas das razons que a Confederaçom Intersindical Galega (CIG) expujo em Março à Directora Geral de Ordenaçom Educativa para implicar este departamento no impulso ao ensino da língua portuguesa na ESO, no Bacharelato e nos ciclos formativos de FP em que som leccionadas línguas estrangeiras. Mas nom só: a CIG entende que a introduçom do português poderia influir na “valorizaçom positiva do galego”, reforçando “a aprendizagem do nosso idioma”. Aproveitando o debate do rascunho do novo currículo de ensino secundário na Galiza, tanto a CIG como o Movimento Defesa da Língua (MDL) já estám a publicitar nos centros educativos os trámites necessários para tornar possível esta opçom e exigem da Administraçom esforços na mesma direcçom. Porém, para além de umhas medidas declaraçons de boa vontade pola parte da Conselharia, o processo encontra numerosos entraves. Explica-no-los Anxo Louzao.

Que lugar deve ocupar o ensino do português na Galiza?

Creio que nom deveria ser ‘segunda língua’ na nossa naçom, mas a realidade é sumamente difícil. Sendo realistas, o que dizemos é que o português tem que ser umha possível segunda língua no ensino, como outras. Neste caso sabemos que parte em inferioridade de condiçons em relaçom a outras como o francês.

Inferioridade, porquê? Há mais professorado de francês? Ou mais procura?

Nom queremos que isto seja visto como umha luita entre línguas. Pensamos que todas podem ser estudadas como segunda opçom. Porém, o natural é que o português tenha polo menos o mesmo status para ser segunda opçom no ensino em qualquer centro do País. Isso hoje nom é assim porque o assunto deve sofrer ainda alguns processos prévios.

Quais?

Primeiro tem que haver professorado capacitado disposto a leccionar e a Administraçom tem de apostar para ser possível oferecer português em cada centro. Em segundo lugar os centros educativos devem solicitá-la após a terem oferecido como optativa e a Administraçom tem que aceitar a proposta dos centros. A Administraçom, em princípio, di que nom teria problema. Qual é o problema entom se todas estes requisitos se cumprem? O problema é que na ESO cada centro pode oferecer até três matérias optativas, no máximo. Como se oferecem dous obradoiros, só fica espaço para umha segunda língua, que é obrigatório oferecer, mas só umha. Num centro nom pode oferecer-se portanto mais de umha língua estrangeira. Com isto, os centros escolhem maioritariamente o francês. O ideal seria que o item de língua estrangeira abrangesse mais possibilidades num mesmo centro para o alunado escolher.

E isso será possível?

Por enquanto nom há nengum quadro legal estatal que obrigue a proceder dessa maneira. Quando for desenvolvida a regulamentaçom do ensino médio segundo a LOE esperemos que as administraçom educativa galega faga umha interpretaçom o mais aberta possível.

É entom umha questom de vontade política?

Obviamente. Se fosse entendida a importáncia, como recurso cultural, educativo e laboral de umha língua com duzentos milhons de falantes... se se entendesse que a nossa língua é deficitária em muitos ámbitos, o desenho estratégico teria de ser necessariamente diferente no ámbito do ensino.

Pensas que mudou a vontade política, com o novo Governo?

Eu vou referir-me à Conselharia de Educaçom, que está nas maos do PSOE. A Estremadura fijo umha aposta decidida neste sentido, contando na actualidade com 9.000 alunos, mas na Galiza nom podemos esquecer que a sensibilidade do PSOE em relaçom a este assunto é mui pobre. Numha reuniom que tivemos há pouco com a directora geral de Ordenaçom Educativa ela estava de acordo em que o português devia ter a importáncia que merecia no ámbito educativo, mas do que se di ao que se fai há-che muita distáncia. A nossa funçom é estarmos atentos e ter umha atitude reivindicativa para que isso seja facilitado.

A Administraçom pode escudar-se na falta de procura... Neste sentido, como dirigente de um sindicato nacionalista, maioritário no sector, que pode dizer para justificar essa paradoxal falta de procura?

O peso da história, determinado com políticas elaboradas para desprezar aquilo que nos é próprio, é enorme. É evidente que o principal problema é o centralismo e diversos projectos políticos que nos fam esquecer que temos um país ao lado que, nom apenas no terreno cultural, mas também no económico e no laboral, poderia ser de grande ajuda. Todos os galegos devem ter trabalho na própria terra, mas hoje em dia nom cabe dúvida de que para muitos galegos o Norte de Portugal fica tam ou mais central do que Espanha, sendo cada dia mais as empresas que trabalham nesta regiom levando pessoal galego.

Que está a fazer a CIG neste momento em prol do português no ensino?

Estamos a fazer umha campanha informativa para dar conhecer esta opçom e os centros de ensino saberem os passos que tenhem que dar. Para além disso comunicamos à Conselharia esta reivindicaçom, levando-a também ao Parlamento Galego. Este ano deu-se um pequeno avanço, que som as estadias em Portugal para formar o professorado, mas depois há cousas inexplicáveis como que agora que começa a haver leitores de francês e inglês nos centros de ensino, mas nom há de português. É interessante explorar este caminho, mas deve dizer-se que existe grande resistência no próprio Portugal para fazer estes intercámbios. Se Portugal tivesse outra atitude, também poderia influir nas perspectivas adoptadas polos governos autonómicos de cá.